Bakının əsas küçələrindən biri genişləndiriləcək?

Milli.Az-ın məlumatına görə, Day.Az saytına məktubla müraciət edən oxuculardan biri Hövsan qəsəbəsinə aparan yolun da genişləndirilib-genişləndirilməyəcəyini soruşur. O, həmin yolun pis vəziyyətdə olduğunu qeyd edir.

"Azəryolservis" ASC-nin mətbuat xidmətinin rəhbəri Pünhan Mürsəlov vaxtilə Zığ-Hövsan yolunun təmir edildiyini, amma ağır tonnajlı avtomobillərin hərəkəti üzündən onun bəzi hissələrinin sıradan çıxdığını bildirib. "Mütəmadi olaraq normadan artıq çəkidə hərəkət edən avtomobillərin saxlanılması üçün reydlər keçiririk. Bu avtomobillərin sürücülərinə qarşı ciddi tədbirlər görülür", - deyə P.Mürsəlov bildirib.

Yolun yenidən əsaslı təmir olunub-olunmayacağına gəlincə, P.Mürsəlov bunun ayrılacaq vəsaitin həcmindən asılı olduğunu söyləyib: "Məlum olduğu kimi, bu, ikizolaqlı yoldur. Gələcəkdə onun genişləndirilməsi ideyası var. Amma əvvəlcə bunun dövlət proqramına salınmasına nail olmalıyıq. Vəsait ayrılacaqsa, Zığ-Hövsan yolunun yenidən qurulmasına başlayacağıq".

Milli.Az