Bakının böyük şossesində tıxacın yaranma səbəbi nədir?

Milli.Az xəbər portalına ünvanlanan oxucu məktubunda, məktub sahibi deyir ki, Sabunçu rayonu ərazisindəki şəhər şossesində hər gün tıxacda qalır: “Sabunçu rayonunda, Balaxanı qəsəbəsinin girəcəyində "dördyol" deyilən yerdə, demək olar ki, hər gün tıxacdır. Saat 8:00-dan 9:30-a kimi həmin ərazidə tıxac olur. Hər gün 20 dəqiqə yolda tıxacda qalırıq. Xahiş edirəm, bizə yardım əlinizi uzadın”.

Bakı Şəhər Yol Polis İdarəsinin bölmə rəisi Vaqif Əsədov Milli.Az xəbər portalına açıqlamasında həmin ərazidə tıxacların yaranmasına aydınlıq gətirdi. Bölmə rəisi bildirdi ki, əsas yol hesab olunan şəhər şossesindəki tıxac, həmin yolun Balaxanı qəsəbəsinə dönən "T" şəkilli yolun kəsişməsində meydana gəlir: “Balaxanı ilə kəsişən yol ikinci dərəcəli hesab olunur. Balaxanıdan həmin yola çıxan avtomobillərin sayı az olduğundan, üstünlük Zabrat istiqamətində olan baş yola verilib. Orada hər iki istiqamətə işıqforun yaşıl işığı yanan zaman hərəkət davam edir. Ona görə də Balaxanı istiqamətində hərəkət edən avtomobillər qarşı tərəfdən gələn nəqliyyat vasitələrini gözləmək məcburiyyətində qalır. Bu isə avtomobillərin hərəkətinin ləngiməsinə və uzun tıxaca səbəb olur”.

Bölmə rəisi hesab edir ki, şəhər şossesində tıxacların aradan qaldırılması və avtomobillərin hərəkətinin yaxşılaşdırılması üçün magistralın hərəkət zolağının sayının artırılması lazımdır. Bu isə hələlik mümkün deyil. Ona görə də, sürücülər işıqforun tələblərinə düzgün əməl etməlidir.

V.Əsədov əlavə etdi ki, bu məsələ ilə bağlı aidiyyatı üzrə “Siqnal” idarəsi qarşısında məsələ qaldırmaq lazımdır. Əgər problem həmin qurum tərəfindən qəbul edilərsə, aradan qaldırılacaq.

“Azəryolservis” Açıq Səhmdar Cəmiyyətinin mətbuat xidmətinin rəhbəri Pünhan Mürsəlov Milli.Az xəbər portalına açıqlamasında bildirdi ki, magistral yol, ən yüksək beynəlxalq standartlar səviyyəsində yenidən qurulacaq. Bu yol, "2011-2013-cü illərdə Bakı şəhəri və onun qəsəbələrinin sosial iqtisadi inkişafına dair Dövlət Proqramı”ına salınacaq və yol əsaslı təmir olunacaq.

Anar Məmmədov
Milli.Az